Salta al contenuto

Abitare e accessibilità

Azioni e attività

La Regjon e promôf intervents par ambients di vite a misure des personis anzianis, midiant dal miorament tecnologjic e de sperimentazion di formis di abitâ inovativis.

La Riforme organiche des politichis abitativis e riordin des ATER dal mês di Fevrâr dal 2016 (L.R.1/2016) e à introdusût diviers cambiaments al sisteme regjonâl e finanziaments specifics che a favorissin l'acès e la abitabilitât di spazis abitatîfs, favorint intervents di inovazion struturâl, ergonomiche e tecnologjiche.

La Leç regjonâl resinte 10/2018 e à afermât cun di plui i principis de progjetazion universâl, cul obietîf di alçâ la cualitât de progjetazion edilizie e urbanistiche e di miorâ la acessibilitât dal spazi viert e dal ambient costruît, garantint a ducj lis stessis cundizions di fruizion.

 

A son atîfs sul teritori regjonâl i Sportei Risposta Casa, che a orientin e che a compagnin i citadins inte ricercje di un puest par vivi, dant ancje informazions su lis agjevolazions e sui contribûts.

Par vê plui informazions:

La Regjon e sosten la instalazion di assensôrs in condominis privâts o gjestîts de ATER dulà che a son presintis personis anzianis o cun disabilitât.

Par vê plui informazions:

La Regjon e sosten la realizazion di progjets sperimentâi presentâts intes Taulis istituidis tes Unions teritoriâls intercomunâls che a previodin modalitâts abitativis inovativis e di cogjestion di servizis e di spazis comuns.

Par vê plui informazions:

La Regjon e sosten, midiant dai Comuns, i nuclis familiârs cu la presince di personis anzianis cul tai des spesis dal fit.

Par vê plui informazions:

La Regjon e previôt la concession di contribûts ai nuclis familiârs cu la presince di personis anzianis, finalizâts al recupar o al acuist, cun recupar contestuâl, de prime cjase.

Par vê plui informazions:

La Regjon e promôf la realizazion di incuintris formatîfs su la “Valutazion urbane de acessibilitât” cu la colaborazion de Aree Welfare di Comunitât (Aziende pe Assistence Sanitarie n. 2 “Bassa friulana-Isontina”) e de Universitât di Triest - Dipartiment di Inzegnarie e Architeture par preparâ lis prossimis gjenerazions di progjetiscj su lis tematichis de progjetualitât par ducj (anzians, disabii, e v.i.).

La Regjon e promôf la difusion di buinis pratichis su la acessibilitât urbane e la creazion dai Plans Eliminazion Barieris Architetonichis (PEBA) ancje cun altris Ents a nivel nazionâl.

La Regjon e sosten la sperimentazion in materie di “Abitare Possibile” e di “Domiciliarità Innovativa”, i intervents a tocjin formis abitativis inovativis par anzians in cundizion di fragjilitât.

In particolâr, la sperimentazion - sedi sul plan struturâl che sul plan gjestionâl e organizatîf - e à l’obietîf di contribuî a ridusi e a prevignî la istituzionalizazion des personis anzianis, midiant de realizazion di soluzions abitativis inovativis in stât di ufrî une alternative reâl aes formis di residenzialitât intindudis in maniere classiche.

Par chescj motîfs, i edificis e i imobii là che si vûl realizâ la sperimentazion a varan di someâ a contescj domiciliârs lontans de logjiche de cjase di ricovar e duncje vê lis carateristichis minimis definidis des liniis vuide in zonte ae DZR 2089 dai 26 di Otubar dal 2017.

La domande di adesion ae sperimentazion e pues jessi inviade – daûr di ce che al è definît des stessis liniis vuide - di sogjets publics e privâts cence fin di vuadagn che a vuelin sotscrivi acuardis di colaborazion cu la Aziende Sanitarie competente pal teritori, cu la UTI di riferiment e cun eventuâi altris sogjets publics/privâts impuartants in chel stes teritori.

Il leam cu la famee, il teritori e i servizis a son la fonde e la garanzie che lis dibisugnis di benstâ - sedi chês colegadis al contest abitatîf dulà che lis personis a vivin, sedi chês socioassistenziâls e sanitariis - a cjatin une definizion juste in progjets personalizâts.

Lis sperimentazions a son monitoradis tes ativitâts in cors di realizazion di bande de Regjon, e si sierin ae fin dal trieni dopo di une valutazion oportune sui risultâts.

Par vê plui informazions:

La Leç regjonâl dai 19 di Març dal 2018, n. 10, “Principis gjenerâi e disposizions atuativis in materie di acessibilitât” e à tant che obietîf gjenerâl l'aument de cualitât de progjetazion edilizie e urbanistiche, par miorâ la acessibilitât dal spazi viert e dal ambient costruît e par garantî a ducj lis stessis cundizions di fruizion, di là des abilitâts e capacitâts psicofisichis di ognidun. Un obietîf a lunc tiermin, che al rapresente une sfide culturâl e sociâl, prime ancjemò che progjetuâl.

La leç e spere intun superament de dissipline nazionâl in vore in materie di riduzion des barieris architetonichis, che ancjemò e cjale al binomi bariere/disabil, promovint une progjetazion inclusive, buine di valorizâ lis abilitâts diferentis di ognidun e duncje di individuâ lis esigjencis di fruizion di une utence plui largje.

Lavorant su plui fronts, cun cheste leç la Regjon si propon di inviâ il cambiament sperât, sostignint une adesion graduâl ae metodologjie de progjetazion universâl e creant lis cundizions par che i siei criteris a jentrin a fâ part de culture dal progjetist; par chest e sosten: la istituzion di un centri unic di riferiment regjonâl in materie di acessibilitât, smirant cun decision su la formazion specialistiche; un progjet di mapadure de acessibilitât su dut il teritori regjonâl; la riduzion des barieris architetonichis di bande dai Comuns che, jentrant tal progjet di mapadure, a podaran beneficiâ dai finanziaments previodûts par chescj intervents.

La leç no si sorepon ae normative nazionâl, ma si zonte a chê e le integre, incoragjant il progjetist a lâ plui indevant: smirâ a sodisfâ ogni gjenar di utence al pues someâ no realistic, ma un orientament di cheste fate, une tension in chest sens, al contribuìs a cirî soluzions diviersis, no par fuarce plui cjaris, e a adotâ une otiche inclusive par otignî un obietîf di cualitât plui alt, no dome di un pont di viste costrutîf, ma ancje sociâl. Une sfide che inte prospetive aromai sigure dal aument de etât medie de popolazion, e à tant a ce fâ cu la cualitât de vite di ducj noaltris.

Par vê plui informazions:

News / Eventi