Salta al contenuto

Culture e turisim

Azions e ativitâts

Midiant dal ent di promozion turistiche PromoTurismoFVG la Regjon e valorize lis ecelencis culturâls, naturalistichis e enogastronomichis di dut il teritori, ancje cun propuestis turistichis pes esigjencis dal turist anzian talian e forest.

Il Progjet Une Regjon par Ducj al à la finalitât di rindi acessibii e gjoldibii lûcs e esperiencis turistichis dal Friûl-Vignesie Julie. Par miorâ la cualitât de ospitalitât pes personis anzianis al è stât formât il personâl dai InfoPoint distribuîts su dut il teritori regjonâl, e lis  vuidis turistichis, chês naturalistichis e i acompagnadôrs turistics.

Al è stât creât cun di plui materiâl promozionâl specific a disposizion tai bancs informatîfs di PromoTurismoFVG e in ducj i uficis comunâi di Informazion Acet Turistic (IAT).

Par vê plui informazions:

Lis ativitâts previodudis intal 2018 a tocjin la realizazion di formazion e di inzornament par operadôrs de ricetivitât alberghiere e de ufierte turistiche regjonâl sui percors pussibii di acès dai turiscj aes curis, focalizâts sui senior e/o su cui che al à patologjiis e/o disabilitâts. La formazion e sarà fate di PromoTurismoFVG e de Aziende pe Assistence Sanitarie n. 2 “Bassa friulana-Isontina”.

A laran indevant ancje intal 2018 la formazion e l'inzornament pal personâl sanitari che al opere intai servizis sanitaris turistics estîfs di Lignan e di Grau.

Troi di Aquilee (Cammino Celeste):

In Friûl - Vignesie Julie a passin viis antighis di pelegrinaç e itineraris storics di fâ a pît che simpri plui a àn la atenzion de bande di un turisim internazionâl, no dome religjôs ma ancje naturalistic e culturâl, che al ame viazâ a pît. Il Troi di Aquilee, pelegrinaç storic praticât par secui, al torne a nassi intal 2008 e al ven pensât tant che Cjamin di pelegrinaç dai trê popui di origjin latine, slave e todescje.

La denominazion “Cammino Celeste” e je leade al fat che chest percors al met insiemi lûcs diviers ma di devozion mariane antighe. 

La part taliane dal Troi di Aquilee si disvilupe in dîs tapis. Il pont di partence al è fissât a Aquilee, par dopo passâ par Cormons, Madone di Mont, Cividât, Gran Mont, e pai Cjanâi di Resie e di Dogne fin al Santuari de Mont Sante dal Lussari. Cualchi percors al è acessibil a ducj e al è adat ancje a cui che al à plui di 65 agns e che al ame viazâ a pît. Inte documentazion in zonte a son segnâts i percors par ducj.

Par vê plui informazions:

La Bibie sot il cîl (La Bibbia a cielo aperto), Çurçuvint (UD):

Intal biel borc di mont di Çurçuvint si puedin preseâ trê percors biblics a teme (dîs moments fondamentâi de storie de salvece, la vie di Marie, la vie de Misericordie) e trê oparis (il Judizi Universâl, il Bon Samaritan e la Trasfigurazion) fatis in mosaic, fotoceramiche e pituradis e esponudis sui mûrs di cjasis privadis e di edificis publics. La Sacre Scriture e devente percors culturâl e di riflession spirituâl, valorizant lis bielecis architetonichis.

Timp necessari: dut il percors, 2 oris e mieze (percors singui di 10' a 40'). Il percors si pues fâ: a pît, in biciclete. Acessibil aes personis cun disabilitât motorie. Nivel di dificoltât: facil / par ducj

Par informazions:

 

Visitis turistichis vuidadis cun percors bogns ancje par cui che al à plui di 65 agns:

Tra lis ativitâts e i percors che PromoTurismoFVG al promôf inte nestre regjon, a son ancje tantis ativitâts buinis par cui che al à plui di 65 agns e che i plâs la vite tal viert, che al vûl movisi a pît e visitâ lûcs interessants cuntune vuide turistiche, e ancje visitis studiadis di pueste par rispuindi aes esigjencis, ai timps e ai moviments di tratis no masse lungjis che a van ben par ducj. Lis visitis turistichis a cambiin daûr de stagjon: in chest sît a vegnin inzornadis e publicadis chês ativis cumò.

Par vê plui informazions: