Salta al contenuto

Info dalla UE

Progetti europei in Regione

Dilunc dal 2018 e je lade indevant la promozion de candidature de Regjon par gnûfs progjets europeans intal ambit di bants relatîfs a programs europeans di cooperazion teritoriâl e/o a gjestion direte, zovantsi di colaborazions internazionâls gnovis o consolidant chês costituidis in progjets europeans precedents e cjapant dentri atôrs regjonâi.

Intal specific, i Programs UE di interès a son: Horizon 2020, il tierç Program UE salût publiche, Ambient Assisted Living Programme, EaSI ( Employment and Social Innovation Programme ), Interreg Europe.

Il progjet ASTAHG- Alpine Space Transnational Governance of Active and Healthy Ageing ( Gjestion dal Spazi Alpin Transnazionâl sul invecjament atîf e in salût ) al è stât presentât sul as 4 Well-Governed dal Program Spazio Alpino e al à tant che teme la gjestion dal invecjament atîf.

Il progjet ASTHAG al nas de necessitât di frontâ l'invecjament de popolazion tant che sfide di cjapâ a nivel transnazionâl, disvilupant la cooperazion intersetoriâl e multi nivel midiant dal coinvolziment dal setôr public e privât par sburtâ su modei inovatîfs.

  • Tra i obietîfs previodûts tal progjet al è il supuart ae inovazion des politichis de Publiche Aministrazion focalizadis sul invecjament atîf, e un miôr coordenament des azions metudis in vore di diviers setôrs e di diviers nivei di gjestion ( governance ) par podê rispuindi miôr aes esigjencis dal teritori.
A cjâf dal progjet e je la Regjon Friûl- Vignesie Julie, Direzion Centrâl Salût, che e disviluparà lis ativitâts progjetuâls par trê agns fin al mês di Avrîl dal 2021 in graciis de colaborazion dal consorzi componût di Italie, Austrie, France, Slovenie e Svuizare.

Par vê plui informazions si rimande ae:

FINANZIAMENT: Il progjet al è finanziât intal ambit di “INTERREG EUROPE” 2014-2020, program che al rapresente la continuazion di INTERREG IVC 2007-2013. Al è finalizât al aument de eficacitât des politichis e dai programs di disvilup regjonâl, in particolâr dai programs che a jentrin intal obietîf "Invistiments a pro de cressite e de ocupazion" ( par esempli METI FESR/FSE ) e, se dal câs, dai programs che a jentrin intal obietîf “Cooperazion teritoriâl europeane” ( CTE ). Il Program al favorìs la colaborazion e il scambi di ideis e di buinis pratichis, in particolâr tra lis autoritâts publichis di dute Europe, par cjatâ soluzions pal miorament des politichis e des strategjiis a benefici de citadinance europeane.

DURADE DAL PROGJET: 5 agns ( il progjet si divît in dôs fasis: 36 mês pe definizion di politichis e strategjiis e 24 mês pe aplicazion su iniziativis a nivel regjonâl ).

OBIETÎFS: l'obietîf finâl al è chel di contribuî a miorâ e a disvilupâ i contignûts des politichis regjonâls e dai struments finanziaris relatîfs, in ambit inovazion/salût. Chest progjet al vûl promovi la creazion di ecosistemis regjonâi utii a sostignî iniziativis e servizis par un invecjament atîf e san, e a favorî il disvilup di soluzions inovativis intal cjamp de salût, rindint cetant plui efetive la lôr aplicazion.

ATIVITÂT: lis ativitâts progjetuâls a saran fondadis suntune valutazion dal stât da la art dai sistemis regjonâi coinvolts intal setôr smart health, o ben te sanitât “eletroniche”, suntun scambi di esperiencis tra i colaboradôrs midiant di events interregjonâi di aprendiment, e su la definizion di modalitâts di trasferiment di cognossincis e condivision di buinis pratichis. Inte seconde part dal progjet, ogni regjon coinvolte e fasarà bogns i risultâts, sostignint e disvilupant progjets e iniziativis a nivel locâl.

Il consorzi al è componût di nûf regjons europeanis, e il Noord Brabant - provincie olandese, partner de rêt europeane CORAL - al è il coordenadôr dal progjet. Par cont dal Friûl-Vignesie Julie, e partecipe la Direzion centrâl lavôr, formazion, istruzion, paritât om femine, politichis pai zovins, ricercje e universitât.

Progetti conclusi

PROGRAM DI FINANZIAMENT: Program Competitivitât e Inovazion ( CIP ) che, inte programazion 2007-2013, al veve chescj obietîfs:

  • promovi la competitivitât des impresis, in particolâr des PMI;
  • promovi dutis lis formis di inovazion, includude la eco inovazion;
  • acelerâ il disvilup di une societât de informazion sostignibile, competitive, inovative e buine pe integrazion;
  • promovi la eficience energjetiche e fonts energjetichis gnovis e rinovabilis in ducj i setôrs, includûts i traspuarts.

DURADE DAL PROGJET: trê agns, dal 2013 al 2016

OBIETÎFS: L'obietîf principâl al jere chel di disvilupâ su largje scjale servizis integrâts di cure al anzian a domicili midiant di soluzions tecnologjichis e informatichis. In Friûl-Vignesie Julie chest progjet al à viodût il coinvolziment dai distrets sanitaris, dai servizis sociâi domiciliârs, di specialiscj e di altris operadôrs, insiemi ai familiârs e ai assistents familiârs dai anzians coinvolts.

Cjâf file dal progjet e je stade la regjon Friûl-Vignesie Julie midiant de Aziende sanitarie universitarie integrade di Triest, che e à vuidât un consorzi componût di 24 regjons europeanis.

ATIVITÂT: Midiant dal progjet al è stât disvilupât e implementât un servizi integrât di tele monitorament a domicili, indreçât prin di dut a citadins anzians ( cun plui di 65 agns ) cun patologjiis cronichis e cu la necessitât di curis complessis. Il campion di personis monitorât midiant dal progjet al è stât cjapât dentri intune inovazion di servizi domiciliâr, in gracie dal supuart di strumentazion tecnologjiche in cjase e dal acès, midiant dal portâl che al è stât ideât di pueste, ai servizis di cure domiciliârs e a altris servizis sociosanitaris.

Il portâl, su autorizazion des personis assistudis, al è acessibil a ducj i operadôrs coinvolts: dal personâl sanitari ai operadôrs sociâi, dai assistents familiârs a associazions di volontariât, e a cooperativis sociâls che a àn responsabilitât di cure sui citadins coinvolts intal progjet.

Ducj i sogjets interessâts a condividin un insiemi comun di dâts e a interagjissin midiant dal servizi di supuart digjitâl. Al è stât creât ancje un sisteme di regjistri dai pazients disponibii a nivel locâl. Di là dal monitorament dai parametris vitâi e ambientâi, un centri di teleassistence e un call center a ufrissin un servizi di teleassistence o videoassistence a disposizion dai fruitôrs/pazients che a àn bisugne di altri supuart.

La plui part dai partners di Smart care a son membris de rêt europeane CORAL (www.coral-europa.eu).

Par aprofondiments:

PROGRAM DI FINANZIAMENT: INTERREG IVC, il program di cooperazion interregjonâl par promovi la condivision di cognossincis e di buinis pratichis intal ambit di dôs areis prioritariis:

  • Inovazion
  • Ambient e prevenzions dai pericui ambientâi

DURADE DAL PROGJET: 2 agns, dal 2012 al 2014.

OBIETÎFS: midiant di chest progjet, i partners si son impegnâts a definî strategjiis regjonâls par promovi la adozion su grande scjale di soluzions di ambients di vite assistûts.

ATIVITÂT: organizazion di une serie di visitis di studi su tematichis leadis al ûs di imprescj tecnologjics e informatics pal abitâ, a supuart dai anzians. Dilunc de visite studi in Friûl-Vignesie Julie (Pordenon) a son stâts presentâts ai colaboradôrs dal progjet esemplis di azions pe vite indipendente e il monitorament domiciliâr: il telesocors, lis soluzions pal adatament tecnologjic di apartaments par garantî la acessibilitât e la sigurece des personis in cundizion di no autosuficience, e il confront tra modei di integrazion di curis formâls e informâls in stât di favorî la domiciliaritât des personis anzianis e/o cun disabilitât.

Par aprofondiments:

 

 

 

News / Eventi