E je une plateforme che e met insiemi i principâi sogjets publics - a nivel locâl, regjonâl, nazionâl e european - e privâts, interessâts a definî une vision positive par invecjâ ben, a fissâ prioritâts comunis, a gjavâ lis barieris ae inovazion, cul obietîf di acelerâ e di puartâ su scjale industriâl la introduzion di soluzions inovativis impuartantis in dute Europe.

Obietîf gjenerâl: incressi di doi agns, dentri dal 2020, la vite in buine salût.

Obietîfs specifics:

• permeti ai citadins europeans di fâ une vite sane, ative e indipendente;
• miorâ la sostignibilitât e la eficience dai sistemis di assistence sociâl e sanitarie;
• potenziâ la competitivitât dai marcjâts pai prodots e pai servizis inovatîfs, in mût di rispuindi aes sfidis dal invecjament sedi a nivel comunitari che mondiâl, creant gnovis oportunitâts pes impresis.

Ambits di azion:

• prevenzion e promozion de salût;
• assistence e cure;
• vite ative e indipendente des personis anzianis.

La EIP-AHA nol è un gnûf program e nol previôt gnûfs fonts, ma si da tant che obietîf di:

• otimizâ l'ûs di risorsis di programs di finanziament europeans za esistents, tant che Salute pubblica, Horizon 2020, Ambient Assisted Living Programme, Employment and Social Innovation Programme, Interreg Europe;
• doprâ une gnove metodologjie di lavôr che e cjapi dentri trê diviersis Direzions gjenerâls de Comission europeane;
• creâ un racuardi tra varis nivei istituzionâi ( locâl, regjonâl, nazionâl e european );
• fâ dialogâ il setôr public e privât;
• favorî il scambi di cognossincis dentri di une plateforme di cuasi 3.000 sogjets, par promovi la adozion su grande scjale di progjetualitâts inovativis.

Par aprofondiments:

• visite il sît par inglês di EIP-AHA

A son sîs rêts tematichis, che a metin dongje sogjets europeans (regjons, citâts, ospedâi, aziendis sanitariis, centris di ricercje, universitâts, impresis, rêts europeanis) che a lavorin insiemi su chestis areis tematichis:

• ( Action Grup A1 ) osservance des prescrizions medichis;
• ( Action Grup A2 ) prevenzion des coladis des personis anzianis;
• ( Action Grup A3 ) prevenzion dal declin funzionâl des personis anzianis;
• ( Action Grup B3 ) sistemis di cure integrade par frontâ malatiis cronichis;
• ( Action Grup D4 ) inovazion par promovi ambients a misure di anzian;
• ( Action Grup C2 ) promozion di soluzions tecnologjichis e informatichis pal abitâ, cul coinvolziment dai utents finâi.

Lavôr fat dai Grups di azion:

• mapadure des progjetualitâts esistentis intes rispetivis areis tematichis par individuâ buinis pratichis, e creazion di une bancje dâts clamade par inglês repository (“dipuesit” );
• dialic costant cu la Comission europeane e informazions anticipadis sui contignûts dai bants europeans;
• predisposizion di un plan di azion che si pues viodi sul sît internet de EIP-AHA.

Par vê plui informazions:

• cjale il plan di azion par inglês;
• visite il sît par inglês di EIP-AHA

In dì di vuê, la Aziende sanitarie universitarie integrade di Triest e je intal grup B3, focalizât sui sistemis di cure integrade par frontâ malatiis cronichis, e la Aziende pe assistence sanitarie “Isontina-Bassa Friulana” intal grup B3 e D4 su la inovazion par promovi ambients a misure di anzian.

Tal mês di Lui dal 2016, la Comission europeane e à dât al Friûl - Vignesie Julie il ricognossiment european di Reference site, o ben di Sît di riferiment, intal ambit dal invecjament atîf. Il status di Sît di riferiment al ven dât dome a realtâts che, intal frontâ la sfide al invecjament, si dimostrin in stât di programâ, adotâ e potenziâ pratichis e strategjiis cetant inovativis.

La nestre Regjon e je stade premiade parcè che e à adotât une leç regjonâl sul invecjament atîf che e invide i politics che a decidin a operâ cun gnûfs paradigmis pal disvilup socioeconomic dal teritori, e che e podarès costituî une buine prassi di puartâ ancje in altris contescj teritoriâi.

In gracie di cheste selezion, il Friûl - Vignesie Julie al fâs part dal Reference Site Collaborative Network – RSCN ( Sît di riferiment de rêt di colaborazion ) e al podarà confrontâsi cun 74 sogjets di 22 Stâts membris de Union Europeane, che a àn otignût chest ricognossiment.

La premiazion uficiâl e je stade fate tal mês di Dicembar dal 2016 intal ambit dal Summit european pe inovazion a supuart dal invecjament atîf. Il premi al è stât ritirât dal Assessôr regjonâl Loredana Panariti.

La candidature a Sît di riferiment e je stade presentade insiemi de Direzion salût, integrazion sociosanitarie, politichis sociâls e famee e de Direzion lavôr, formazion, istruzion, paritât om femine, politichis pai zovins, ricercje e universitât, cul coinvolziment dal Istitût “Rittmeyer” che al veve vût chest ricognossiment intal 2013.

Chês altris Regjons e Provinciis talianis che a àn vût il ricognossiment di Sît di riferiment a son: Campanie, Emilie - Romagne, Lazi, Ligurie, Lombardie, Piemont, Pulie, Toscane, Provincie Autonome di Trent, Regjon Venit midiant de Società Arsenàl.IT.

Il prin incuintri dal RSCN ( Sît di riferiment de rêt di colaborazion ) al è stât a Rome ai 23 e ai 24 di Març dal 2017 e al è stât organizât in colaborazion cun ProMIS, o ben “Programma Mattone Internazionale Salute”.

Par vê plui informazions:

• liste par inglês dai Sîts di riferiment ( Reference Sites ) europeans
• visite la sezion di chest sît "Gnovis e Avigniments" pe cerimonie di premiazion de regjon tant che Sît di riferiment;
• prin incuintri RSCN a Rome intal Març dal 2017.

Il Blueprint al è un document strategjic par promovi la trasformazion digjitâl intal ambit de salût. La Comission europeane e proviodarà a tradusi in azions concretis i principis contignûts in chest document. L'obietîf primari di cheste strategjie al è il disvilup di une vision condividude su cemût che il marcjât unic digjitâl al puedi contribuî a dâ une assistence sanitarie miôr, sistemis sanitaris sostignibii e oportunitâts di cressite economiche dentri de Silver economy ( Economie di Arint, o ben l’invecjament tant che risorse ).

Par vê plui informazions:

• Blueprint (sît par inglês)

Il Friûl-Vignesie Julie, midiant dal Ufici di Bruxelles e cul supuart di sogjets dal teritori ( Aziendis sanitariis, Universitâts, Centris di Ricercje e Direzions centrâls cun competencis intal setôr dal invecjament atîf ), al à partecipât in maniere direte aes variis fasis de EIP-AHA, tacant:

• de conference di inviament EIP-AHA organizade de Comission europeane cui puartadôrs di interès ( stakeholders ) tal mês di Novembar dal 2011, e de consultazion on line;
• de partecipazion ai seminaris organizâts des Direzions gjenerâls de Comission europeane ( DG SANCO - DG CONNECT – DG Ricercje ), par furnî contribûts pal plan strategjic;
• de istituzion di CORAL, rêt europeane promovude par favorî la partecipazion des regjons intes iniziativis de EIP-AHA.

Par vê plui informazions:

• consultazion on line ( document par inglês );
• rêt CORAL

Proponintsi par colaborâ dentri dai Grups di azion. Chescj grups a rapresentin di fat rêts tematichis che a permetin di lavorâ cun altris Regjons europeanis e duncje a dan la oportunitât di cjatâ colaboradôrs potenziâi par aderî a consorzis par partecipâ a bants europeans leâts al invecjament atîf.

Par proponisi tant che sogjets atîfs si à di rispuindi a invîts ( par inglês call for committment ), che a vegnin mandâts fûr in maniere periodiche de Comission europeane.

REPOSITORY

E je une base di dâts creade midiant dal progjet PRO EIP-AHA cu la finalitât di coordenâ il lavôr fat di ognidun dai grups di azion. Midiant di chest progjet, a son stâts selezionâts sîs promotôrs ( promoter ), un par ogni grup di azion, che a àn vût il compit di promovi i risultâts di ogni grup.

Cheste base di dâts e je il strument par favorî la strategjie di adozion su grande scjale ( par inglês scaling up ) des buinis pratichis de EIP-AHA.

Par vê plui informazions:

• Buinis pratichis promovudis dai sogjets tai grups di azion

Par favorî il disvilup regjonâl de inovazion a son stâts publicâts bants indreçâts ai Sîts di riferiment par promovi la organizazion di seminaris che a permetin il trasferiment di cognossince di organizazions che a stan za doprant une pratiche inovative ( par inglês, originator organization ) a organizazions che a vuelin inviâ sul lôr teritori cheste pratiche inovative ( receiving/adopter organisation ). Ancje cheste iniziative e je dentri tal contest de strategjie di adozion su grande scjale di pratichis inovativis de EIP-AHA.

Par vê plui informazions:

• strategjie di scaling up

E je une matriç di valutazion elaborade de Comission europeane in colaborazion cul Centri di Ricercje Comune ( par inglês Joint Research Center ) par monitorâ i risultâts che e à rivât a vê la cooperazion europeane sul invecjament atîf.

Par promovi la adozion di chest imprest, la Comission europeane e je daûr a organizâ une serie di incuintris par sclarî cemût doprâ i indicadôrs individuâts midiant dal Monitoring and assessment framework for the EIP-AHA ( MAFEIP ). Dilunc de setemane, su la e-health ( o ben, salût digjitâl o midiant de rêt ) di Malte, al è stât organizât un event di aprofondiment sul ûs di chest strument.

Par vê plui informazions:

• colaboradôrs de plateforme MAFEIP

Dongje de colaborazion europeane pal invecjament atîf, intal 2012 al è stât burît fûr ancje l'Indiç di Invecjament Atîf ( AAI ). Al è un progjet promovût de Direzion gjenerâl ocupazion afârs sociâi e inclusion sociâl de Comission Europeane in colaborazion cu la United Nations Economic Comission for Europe ( UNECE ), che midiant di chel a son stâts individuâts indicadôrs par misurâ l'impat des politichis a supuart dai anzians. Pe elaborazion di chest Indiç e je stade adotade cheste definizion: “L'invecjament atîf si riferìs a situazions là che lis personis a van indevant a jessi ativis intal mont dal lavôr o a son coinvolzudis in ativitâts no paiadis ( tant che la assistence a components de proprie famee e/o il volontariât ) e a vivin ancjemò in salût e indipendentis”.

Intal ambit di chest Indiç, a son stadis creadis 4 areis diferentis ( ocupazion, volontariât/partecipazion sociâl, stîi di vite indipendente, invecjament atîf leât a fatôrs ambientâi ). Par misurâ chestis areis, a son stâts identificâts 22 indicadôrs e, su la fonde di chescj, a son stâts individuâts i Paîs plui virtuôs ( Svezie, Irlande, Danimarcje ).

Par vê plui informazions:

• AAI

La regjon Friûl-Vignesie Julie, midiant dal Consei regjonâl, e à partecipât a une riunion dal Grup di Alt Nivel dal AAI che si è davuelte tal Ufici di Bruxelles, e midiant dal istitût di Ricercjis Economichis e Sociâls ( IRES ) a revisions tra colaboradôrs, organizadis intal ambit dal AAI.

E je previodude la continuazion dal scambi di informazions cui funzionaris de Comission europeane che a stan daûr aes tematichis dal AAI. Dongje dai indicadôrs individuâts midiant di chest indiç, a vignaran esaminâts ancje i indicadôrs elaborâts dal progjet european Survey of Health, Ageing and Retirement in Europe ( SHARE ) ( o ben, Indagjin su Salût, Invecjament e Pensionament in Europe ).